Nasyon Zini di mèkredi restriksyon ke Taliban mete sou dwa fanm ak tifi “rive vrèman fèmen” pifò nan yo lakay yo, sa ki fè Afghanistan tounen peyi nan mond la ki gen “plis represyon” kont fanm.
Deklarasyon l-ONU nan okazyon Jounen Entènasyonal Fanm nan yo vini nan moman militan fanm reyini nan lari kapital Afghanistan an Kaboul pou yon 2èm jounen pou yo pwoteste kont entèdiksyon ke rejim Taliban an mete sou edikasyon ak travay pou medam yo.
Alatèt misyon l-ONU nan Kaboul, Roza Otunbayeva, di: “Fòse mwatye nan popilasyon an rete nan konfinman lakay se youn nan pi gwo kriz imanitè ak ekonomik ki ekziste e se yon kokenn zak kote nasyon an li menm ap fè tèt li soufri,” e Otunbayeva relanse apèl pou mande Taliban sispann e ranvèse “restriksyon sevè” sa yo”.