Sekretè Deta Etazini Anthony Blinken di administrasyon Biden nan sipòte lavant avyon konba djèt F-16 ak Tiki, e li eksprime konfyans ke Swèd ak Finland ap antre anvan lontan nan alyans l-OTAN an, pandan li t ap vizite Ankara pou fè chita-koze lendi ak lidè Tiki yo.
Kongrè Etazini an dwe apwouve lavant F-16 yo pou 20 milya dola, e nan afè sa a gen yon demann pou 40 djèt ak prèske 80 kit pou modènize ekipman yo.
Blinken di nan yon konferans pou laprès ansanm ak Minis Afè Etranjè Tiki Mevlut Cavusoglu ke li p ap bay kalandriye sou mouvman pou enfòme Kongrè a ofisyèlman sou pwopozisyon lavant la.
Cavusoglu di afè F-16 yo pa makònen ak obligasyon pou Tiki apwouve Swèd ak Finland pou yo antre nan l-OTAN. Tiki ak Ongri rete sèl manm l-OTAN ki pa dakò pou Swèd ak Finland antre nan alyans la, e antre yo a dwe gen apwobasyon tout manm alyans la san wete younn.
--