Administrasyon Biden nan ap ankouraje lidè Ikrèn-yo an prive pou yo moutre yo ouvè pou negosye ak LaRisi e abandone pozisyon kote yo refize fè chita-koze lapè toutotan Prezidan Vladimir Putin pa pèdi pouvwa-a, se sa jounal Washington Post rapòte samdi-a.
Jounal-la site pawòl moun san site non-yo ki abitye ak diskisyon sou kesyon-an ki fè konnen demand otorite ameriken-yo se pa ke y-ap pouse Ikrèn pou-l chita bò tab negosyasyon-an, men ke se yon efò kalkile pou asire ke Kyèv kontinye gen sipò lòt nasyon k-ap fè fas ak pèp-yo ki pa anvi chofe yon gè pou plizyè lane k-ap vini.
Jounal-la di diskisyon-yo moutre jan pozisyon administrasyon Biden-nan sou Ikrèn konplike, kote piblikman li sèmante pou-l sipòte Kyèv ak gwo mas sòm lajan « pou tout tan sa nesesè » pandan li espère jwenn yon solisyon pou konfli-a ki la depi 8 mwa e ki gen gwo konsekans sou ekonomi mondyal-la e deklannche perèz kòmkwa ka gen yon gè nikleyè.