Prezidan Joe Biden anonse jodi vandredi a nouvo aksyon ekzekitif pou wete etikèt kriminèl nan Etazini sou marijuana, ki legal kounyea pou izaj medical nan 37 eta ameriken e ke moun ka jwenn pou distraksyon nan 19 eta, epi tou nan kapital nasyonal Etazini an ak nan zile Guam.
Nan yon mesaj anrejistre, Biden di l ap anonse, ak yon dekrè, padon pou tout ofans federal ki te fèt deja, kote moun te senpman posede marijuana. Padon sa a ka afekte plis pase 6-mil-500 Ameriken, dapre sa kèk dirijan Mezon Blanch di jounalis yo.
Biden mande tou, jedi, pou gouvènman federal la rekonsidere jan lwa federal la klase marijuana. Kounyea, DEA rekonèt li kòm yon dwòg Premye Klas, ki pa gen izaj medikal e ki gen anpil chans pou fè moun esklav li, menm jan ak ewoyin ak LSD.
Responsab Mezon Blanch yo di jounalis yo prezidan an kontinye sipòte limit sou trafik marijuana, e toujou kont moun k ap fè marketing pou yo vann li ak jèn moun ki pa nan laj pou pran okenn dwòg.