Ann Angletè, dè milye moun pase plizyè hè'd tan ap fè la ke pou yo te ka pase kèk minit devan sèkèy Rèn Elizabeth II ki ekspoze nan syèj palman an Westminster Hall.
Ke sa a kouvri 7 kilomèt e li depase pon ki rele Tower Bridge la nan Lond.
Joanna Jackson se moun Bedfordshire:
" Nou komanse trajè nou a 645 maten an bo kote rivyè Thames lan. Donk sa pran nou 4 hè pou rive kote nou ye a, ki pa mal. Nou te konprann ak tout jounalis kap fè repotaj sa tapral pran nou omwens 20 a 25 hè pou nou rive la a. Jiskaprezan tout bagay byen mache. Se yon moman istorik. E chak fwa mwen rive pi pre mwen santi mwen pi emosyone pase sa mwen te atann. Mwen te kwè mwen patap kriye men chak fwa mwen pwoche mwen santi m emosyone pi plis."
Romila Jones limenm se moun Lond:
"Gen anpil antisipasyon men se yon okazyon sonb tou. Nou tris anpil. Nou te atann nou a sa men nou tris kanmenm."
Bob McCloud limenm soti Ekos pou wè rèn nan:
" Se yon bagay mwen vle fè. Rèn nan te chèf mwen. Mwen se yon ex militè donk rèn nan se chèf mwen depi 22 zan. Se yon moman mwen tap tann paske li gen anpil enpotans pou mwen."
Wa Charles III ap pase jounen an ap "reflechi an prive" yon semèn apre lanmo manman ni 8 Septanm a laj 96 zan.
Jason Hueng se moun Hong Kong men lap viv Lond:
"Nou te renmen rèn nan. Li rann peyi a yon gwo sèvis. Se yon onè ak yon privilèj pou nou rann omaj a rèn Elizabeth."
Palè Buckinhan pibliye detay sou plan fineray rèn nan, ki fikse pou Lendi.
Se pral premye fineray nasyonal ki fèt nan peyi Angletè depi 1915, lè ansyen Premye Minis Britanik Winston Churchill te mouri.
Enfomasyon pou repotaj sa a soti nan Associated Press