Ayiti

Ayiti: 3 Moun Pèdi Lavi yo Nan Manifestasyon

Manifestan Ayisyen kouri apre lapolis tire gaz lakrimojen pandan yon manifestasyon pou mande depa Premye Minis Ariel Henry sou pouvwa a nan Potoprens, Lendi 29 Out, 2022.

Daprè sa yon òganizatè ak lapolis fè AFP konnen, depi Lendi gen apreprè 3 moun ki pèdi lavi yo nan manifestasyon ki ap dewoule toupatou nan peyi d'Ayiti, kote popilasyon ap mande demisyon Premye Minis Ariel Henry.

Depi lendi, pèp la te monte barikad sou wout prensipal yo, tankou nan sid peyi a, sa ki te fòse transpò piblik ak biznis yo pa fonksyone. Manifestan yo denonse an patikilye mank gaz ak ensekirite ki genyen nan peyi a.

Yon manifestan te pèdi lavi l lendi nan kapital peyi a. Daprè Serge Jean Louis, yon opozan Ariel Henry ak youn nan òganizatè rasanbleman an, yo pat rive idantifye moun ki te louvri kout zam sou foul la.

Li kontinye poul di "Se yon atak grav sou libète manifestan yo genyen pou yo manifeste nan peyi a. Yo te touye yon sitwayen paske li (reklame) pi bon kondisyon lavi nan peyi a".

Nan sid peyi a, nan Okay, 2 moun mouri madi pandan lapolis t ap eseye debloke wout ki bay aksè ak direksyon ayewopò a, yon responsab lapolis demanti akisasyon ki ta fè kwè se lapolis ki responsab lanmò sitwayen sa yo.