Yon tribinal nan Moskou te deklare, semèn pase a, ke Ministè Jistis te mande pou fèmen ajans Jwif la akoz swadizan vyolasyon legal ke li pa presize e li fikse yon seyans depozisyon pou 28 Jiyè k ap vini an.
Kèk ekspè entèprete sa kòm yon avètisman Kremlen an pou Lapid, ki pran yon pozisyon pi du sou kesyon lagè Ikrèn nan pase ansyen Premye-minis Israel Naftali Bennett, ki te kite pouvwa a Premye Jiyè pase.
Lapid di nan yon reyinyon gwo zotobre dimanch ke "fèmen Ajans Jwif la se ta yon evènman serye ki ta afeke relasyon ant 2 peyi-yo," dapre yon kominike gouvènman an.
Ajans Jwif la, ki te tabli an 1929, te jwe yon wòl kle nan kreyasyon eta Israel la an 1948. Li te koumanse fonksyone nan LaRisi an 1989, 2 lane anvan finisman Inyon Sovyetik la, e apre evènman sa a, plizyè santèn milye Jwif ki t ap viv la te pati ale ann Israel.