Yon gwoup apeprè 2-mil moun, jèn gason sitou, koumanse mache jedi soti nan bouk Huixtla nan sid Meksik.
Men gen yon pakèt fanmi ak timoun ki deside tann nan Huixtla pou wè si yo ka jwenn yon viza tanporè, paske yo bouke mache apre yo fin pakouri 40 kilomèt, soti toupre fwontyè Gwatemala-a, nan 2 jou.
Kèk moun k-ap defann migran fè konnen otorite-yo ap bay sa ke yo konsidere kòm viza sòti, ki bay migran-yo ant youn a 2 mwa pou yo kite peyi-a.
Viza sòti sa-yo ap pèmèt migran-yo mande azil nan Meksik oubyen sikile alèz nan peyi-a.
Yoyner Yanez ki gen 20 lane gen yon viza konsa depi li te rive Meksik.
Yanez te kouri pou kriz Venezuela a, men yo ba-l dwa pou prezante ka-li nan imigrasyon Meksik vè finisman mwa Daout.
Olye li rete tann nan sid Meksik pou plis pase 2 mwa, Yanez te deside antre nan karavàn-nan e mete tèt nan direksyon nò.
Kounye-a l-ap tann nan yon pòs enspeksyon imigrasyon ak espwa pou-l jwenn yon viza sòti pou kontinye chimen-li.
Direktè Sipèvizyon Defans nan Biwo Washington pou Amerik Latin-nan, Adam Isaacson di anpil migran deside antre nan karavàn nan pou evite viv nan mizè pandan kèk mwa nan sid Meksik.
Yon bon valè nan yo, se moun Venezuela.
Jwenn yon antant sou jan pou jere migrasyon nan rejyon-an, sete yon gwo priorite pou delege ki reyini, semèn sa-a nan Los Angeles.
Administrasyon Biden-nan pa vle imaj 15-mil migran detounen atansyon sou Somè Amerik-yo, se Isaacson ki
pale konsa. Li ajoute ke viza sa-yo ka "fè moun pa wè imaj sa-yo ankò.
Sa pa gen lontan, Meksik te chache kraze karavàn sa-yo nan ofri pou fè migran sa-yo ale nan lòt vil kote yo ka chache gen estati legal. Nan kèk ka, gouvènman-an chache fè migran-yo bouke nan pa kite kamyon ak otobis ba-yo woulib.