Ajans entènasyonal k ap jere aktivite imanitè nan lemond fè konnen yo akeyi ak satisfaksyon gwo kantite asistans Ikrèn jwenn depi envazyon miliè Larisi a; sepandan yo gen kèsote pou kriz sa a pa detounen atansyon ak finans ke lòt sitiyasyon imanitè dijans merite ann Afrik, nan Mwayen Oryan an ak lòt kote nan lemond.
Yon otorite nan òganizasyon charite entènasyonal Save the Children deklare “gwo kokenn kriz refijye a nan Ikrèn pwovoke “yon repons ekstwòdinè” sou plan konpasyon ak èd.”
Gregory Ramm, ki sipèvize repons imanitè pou òganizasyon an e ki baze nan Washington DC, ajoute:
“Nivo sipò finansye ki al jwenn Save The Children, lòt òganizasyon non-gouvènmantal ak ajans l’ONU yo, plis sipò ki sòti bò kote gouvènman ameriken an, se yon solidarite ki pèmèt drapo ikrenyen an flote byen wo. Franchman, sipo sa a atenn yon nivo ekstwòdine.”
Sepandan Ramm ajoute: “Genyen anpil lòt kriz yo neglije. Jounen jodi a, nou gen yon mond k ap fè fas ak konfli, ak kriz klimatik, KOVID, epi li toujou difisil pou atire atansyon sou sitiyasyon an nan Soudan, nan pati lès Kongo, Yemèn, Sahèl, nan rejyon kote timoun ap soufri menm jan ak timoun ikrenyen yo.”