Otorite chinwa yo siyen yon pwojè-akò sekirite ak achipèl Zile Salomon yo nan Pasifik Sid la. Antant sa a, ke yo te anonse semèn pase a, soulve kè-sote nan Ostrali ak New Zeland sou posiblite pou ta gen yon baz chinwa nan zile Salomon yo pou sa ki deja pi gwo fòs lamarin nan mond la.
Lòt jou la a, Naval News, yon jounal ofisyèl Marin Wayal Grand Bretay la, te pibliye yon atik ki pale de yon "lajisman masif" nan pi gran enstalasyon kote LaChin konstwi bato. Li rele Lakou Jiangnan nan Shanghai, li ka gen yon basen pou pran gwo bato, ak yon gran espas sèk pou plizyè bato kanpe, dapre atik jounal la.
LaChin ap laji 2 lòt enstalasyon pou konstwi sou-maren nikleyè, dapre atik la. Li ajoute ke lajisman an ouvè
posiblite pou bati pòt-avyon ki mache ak enèji nikleyè pou Lamarin Lame Liberasyon Popilè a.
Yon pòtpawòl pou Anbasad Chinwa a nan Washington pa te reponn demand nou pou pale sou modènizasyon militè a.