Yon afè 500 migran ki soti Amerik Santral, Venezyela ak lot peyi antre nan lese frape ak gad Nasyonal la nan sid Meksik Vandredi. Sandra Lemaire gen detay.
Migran yo dekri mach yo tap fè a tankou yon manifestasyon tradisyonèl ki gen rapo al Semèn Sent la. Moun ki te devan foul la te pote kwa blan menm jan yo te konn fè sa nan ane ki pase yo.
Nan yon lese frape ak Gad Nasyonal la epi ajan imigrasyon, migran yo te sèvi ak kwa yo tap pote a pou fonse sou jandam yo - kwa a te kraze.
Gad nasyonal la ki te gen boukliye pou pwoteje tèt yo te sèvi ak baton epi sak sanble gaz lakrimojèn. Yo te arete kèk manifestan men gen lot ki te rive chape.
Migran yo plenyen pou di yo bloke Tapachula epi pwosesis pou tande demann azil yo ap trennen. Pandansetan yo paka jwenn travay nan eta Chiapas ki ta pèmèt yo apiye fanmi yo.
"Sityasyon nap viv la a yo pratikman kenbe nou kom prizonye. Yo pa kite nou kite eta sa a paske nou pa gen papye," Noreydi Chávez, yon migran Venezyelyèn deklare. "Yo egije nou gen viza men yo pa janm reponn kestyon nou. Nou ranpli papye epi nou tann plizye mwa. Yo pa aji jan yo ta dwe fè."
Reynaldo Bello, yon migran ki se moun Pewou te patisipe nan mach la ak madanm ni ki se moun Venezyela epi ti bebe yo.
"Nou patka jwen dlo, pa fwa nou te jwen lot fwa nou pa jwenn. Manje a pi difisil paske nou paka travay e sa nou antre pa ase pou viv. Nou blije youn ede lot pou manje ak bagay konsa," Reynaldo deklare.
Mach la dewoule nan moman Prezidan Joe Biden anonse Etazini pral mete fen nan politik kote li repouse moun ki vle mande azil lakay li anba yon lwa ki gen rapo ak sante piblik ki rele Tit 42.
Etazini ekspilse 1,7 milyon moun anba lwa sa a depi mwad Mas 2020.