"San yon aksyon touswit, nou gen devan nou yon kriz grangou ak malnitrisyon nan Afganistan," se pawòl Seketè Jeneral l-ONU Antonio Guterres nan yon konferans maraton ki te fèt sou entènèt. Li ajoute, "Moun ap vann pitit-yo ak ògàn nan kò yo pou yo ka bay fanmi yo manje. Ekonomi Afganistan an plonje plat atè."
Devan soufrans ki nan Afganistan akoz efè 2 dizèn lane lagè, yon seri gwo sechrès youn apre lòt ak COVID-19, Nasyon Zini leve vwa li pou mande $4.4 milyon pou ede 20-milyon Afgan jwenn manje, abri, swen medikal ak lòt èd esansyèl - premye fwa l-ONU lanse apèl pou mande anpil lajan konsa.
Pami gwo donatè yo gen Grand Bretay ki pwomèt 374 milyon, Etazini ki anonse preske $204 milyon nouvo asistans; Almay ki ap bay $218 milyon ak Japon ki pwomèt $109 milyon. Antou, l-ONU fè konnen se 41 donatè ki pwomèt nouvo finansman.