Nan yon anons ke li te voye bay LaVwadlamerik, ajans kontwòl la ki rele Roskomnadzor fè konnen sit an lang ris rezo a te gen 24 è pou wete yon nouvèl ke Moskou konsidere kòm ilegal, oubyen y ap bloke l.
Nan yon lòt siy ki moutre jan li enpòtan pou tou le 2 pati yo jan laprès rapòte gè a pou piblik la, Inyon Ewòp la anonse mèkredi yon entèdiksyon sou emisyon ak sit entènèt ki afilye ak medya ke leta ris finanse, ki se RT ak Sputnik poutèt yo ta bay enfòmasyon defòme.
Direktris Pwovizwa Vwadlamerik Yolanda Lopez fè konnen rezo a okouran lòd ajans kontwòl medya a men ke li p ap konfòmel.
Madam Lopez ajoute, "Pèp ris la merite pou l gen aksè san baryè nan yon près lib e, konsa, nou paka konfòme nou ak demand Roskomnadzor la."
Radio Ewòp Lib / Radio Libète (abreje RFE/RL) ak Vwadlamerik se rezo ke lajan kontribyab yo finanse, ki anba kontwòl Ajans Etazini pou Medya Mondyal yo ki gen abreje ann angle USAGM.