Yon majorite nan palman peyi Libi apwouve ansyen minis enteryè Fathi Bashagha pou dirije yon nouvo gouvènman inite nasyonal.
Bashagha, yon islamis ak ansyen kòmandan milis ki se moun Misrata, sanble gen ase sipò fòs milisyen yo nan lwès peyi a pou-l ka fonksyone nan pòs la, malgre Premye-minis ki la a, Abdul Hamid Dbeibeh, refize desann.
Laprès nan Libi pibliye video sesyon palman an jedi nan bouk Tobruk nan lès peyi a, ki moutre prezidan palman an, Aguileh Saleh, ki ap anonse kote palman an apwouve nouvo premye-minis inite nasyonal la Fathi Gashagha ak yon majorite vwa.
Kèk minit apre, palman Libi a apwouve yon seri amandman nan konstitisyon an, ki pare teren pou eleksyon palmantè ak prezidansyèl nan 14 mwa. Eleksyon yo ki te fikse anvan sa pou 24 Desanm, te anile lè komisyon elektoral peyi a te anonse ke li pa te pare pou vòt la.