Jous nan kòmansman ane 2019 la, moun pa t tèlman tande pale de Juan Guaido. Magre li se youn nan pi jenn reprezantan opozisyon an nan Chanm Depite a, lavi li ta pral chanje totalman nan dat 5 janvye a lè li te monte nan tèt Asanble Nasyonal la. E nan 3 semèn sèlman ou te jwenn non li nan preske tout gran tit nouvèl yo atravè lemond, espesyalman aprè li te deklare tèt li “Prezidan ki pran an men jesyon Peyi Venezuela."
Jounen jodi a M. Guaido tounen yon pèsonalite-kle pou opozisyon an nan konfwontasyon lidè opozan yo ap livre kont Prezidan Nicolàs Maduro ke anpil obsèvatè (anndan kou andeyò Venezuela) konsidere kòm yon diktatè.
Juan Guaido -yon nonm politik ki genyen 35 kan- te etone sitwayen venezuelyen yo ak lemond antye nan jounen mèkredi 23 janvye a lè li te deklare tèt li "Prezidan Pwovizwa" peyi a. Li te fè deklarasyon sa a devan yon gwo kokenn foul patizan ki te pran lari nan Karakas pou yo te pwoteske kont rejim Maduro a ki, sa pa gen lontan, te re-eli tèt li pou yon dezyèm manda 6 zan youn aprè lòt.
Juan Guaido
Aprè Guaido te anonse li se Prezidan Pwovizwa ki an chaj jesyon Venezuela, li te jwenn apui pi fò peyi latino-ameriken yo plis sipò Lèzetazini ak Kanada. Nan yon peyi kote yon kriz ekonomik ap vin pi grav chak jou, kote plizyè santèn milye sitwayen kouri al viv aletranje, anpil nan sila yo ki rete nan Venezyela ap tann avèk anpil enpasyans arive yon nouvo lidè pou sove yon peyi rich an petwòl anba yon gouvènman sosyalis ki sou popvwa a depi 2 dizèn dane.
MEN, KIYES JUAN GUAIDO YE?
Nan je kèk nan moun ki pa vle wè Guaido yo, misye se yon òm politik san eksperyans avèk yon diskou ki pa fin twò klè, tandiske kèk lòt obsèvatè konsidere li kòm yon nonm ki ka bati consensus, yon rasanblè e yon gran òganizatè.
Juan Guaido se yon enjenyè endistriyèl ki te pran diplòm li nan Inivèsite Katolik Karakas la; ansuit li te etudye administrasyon piblik Ozetazini ak Venezuela. Li fè pati nouvèl jenerasyon politik la ki te parèt nan moman pwotestasyon etidyan yo t ap dewoule nan lane 2007.
Patwon ki dèyè monte rapid Juan Guaido sou sèn politik la se Leopoldo Lopez, youn nan lidè opozisyon ki pi popilè nan istwa resant Venezuela e ki twouve l an rezidans siveye depi kèk mwa deja. Se avèk anpil fyète, anpil ògèy jenn òm politik la pale pou l di, menm jan ak Leopoldo Lopez, li se youn nan fondatè Pati Volonte Popilè a ki egziste depi plis pase 10 zan.
Juan Guaido ki t ap pran yon ben-de-foul apre li te fin deklare tèt li Prezidan Pwovizwa an tan ke Prezidan Asanble Nasyonal la ki deklare 2èm manda Prezidan Nicolas Maduro a se yon manda ilejiitim.
Magre Juan Guaido se yon politisyen relativman jenn, li genyen yon karyè 9 lane nan Asanble Nasyonal la avèk 5 kan (2011-2015) kòm Dipite Sipleyan epi 4 ane kòm Depite Titilè. Li te travay nan Kongrè a kòm prezidan Komisyon Kontwòl Bibjetè an 2017 e, an 2018, li te sèvi kòm chèf-de-fil fraksyon opozisyon an nan asanble a.
Nan yon entevyou Misye Guaido te bay Ajans nouvèl Associated Press sa pa gen lontan, li fè konnen li pa pè menas advèsè li, Nicolàs Maduro, ap lanse kont li. Sou plan sa a li lonje dwèt sou sa ki te pase nan manifestasyon de mas 2017 yo e li di:
"Jiska prezan, mwen genyen lakay mwen bal an kawoutyou yo te tire sou mwen pandan manesfestasyon sa yo.” Juan Guaido ajoute:
"Nou se sivivan e nou pral kontiye siviv, paske bou kwè, nou gen konviksyon bagay yo oblije vin pi bon nan Venezuela. Si yo arete Juan Guaido, yon lòt Juan Guaido pral leve, paske jenerasyon sa a pa p kanpe, li pa fatige e li pa p janm fatige non plis."