Lidè peyi manm òganizasyon trete atlantik nò a, Lotan, ap rankontre pou 2zyèm e dènye fwa nan kad somè Brusèl la jodi jedi a, malgre yo toujou toudi anba deklarasyon piman bouk prezidan ameriken Donald Trump te lanse yè lendi a kont peyi Lalmay ak kont alyans la limenm. Lidè Lotan yo espere mete sou kote egzijans lidè Etazuni-an ap fè pou yo dekese plis lajan nan budjè defans yo, e santre atansyon yo pito sou fason pou mete fen nan lagè Afganistan an. Prezidan Donald Trump soulve dosye ogmantasyon depans militè peyi Lotan yo jodi jedi-a pandan yon konferans deprès nan Brusèl kote somè-a ap dewoule-a.
"Prezidan ameriken ap vinn isit la depi plizyè lane nan rankont sa yo, kote yo abòde kesyon gwo lajan Etazuni ap depanse, gen anpil pwogrè ki fèt nan sans sa a depi lè a, tout moun dakò pou ranfòse angajman yokote yo pare pou aji nan yon dimansyon yo pat janm panse yo ta pral aji anvan sa ".
Lidè ameriken an, ki gen pou l' rankontre fas-a-fas ak prezidan Larisi a Vladimir Putin nan Helsinki , kapital Fenland, mansyone kesyon sa a pandan konferans deprès la.
" Kom nou konnen, mwen pral rankontre ak prezidan Putin lendi kap vinn la a, nou pral nan rankont sa-a san gwo dosye nan tèt nou, nou vle konnen sak ap panse nan Siri, nou pral pale sou enjerans Larusi, mwen pral poze pwoblèm sa a ankò, nou pral pale sou lòt sujè tou tankou Ikrèn".
Prezidan Trump fè deklarasyon sa yo pandan yon konferans deprès jodi jedi-a nan Brusèl.