Etazini

5 Moun Mouri Plizyè Lòt Blese nan yon Fiziyad nan Annapolis, Maryland

Foto sa a montre moun ki t ap kite lokal jounal The Capital aprè yon atakan te ouvè kout-zam epi li touye 5 moun pou pi piti, tandiske li blese anpil lòt. (Annapolis, Maryland, 28 jen 2018).

Nan Annapolis, kapital Eta Maryland, Ozetazini, otorite yo fè konnen enkoni ouvè kout-zam sou moun ki te nan lokal yon jounal, Capital Gazette, kote anviwon 5 moun pou pipiti pèdi lavi yo e plizyè lòt blese.

Lapolis mete men sou yon sispèk. Ajan sekirite ap fouye bilding nan kote y ap chache plis sispè epi ede anplwaye jounal la ki pa blese yo sòti an tout sekirite. Lamezon Blanch fè konnen Prezidan Trump aprann nouvèl la.

Kalite ensidan sa yo, swa fiziyad nan lye piblik, ogmante Ozetazini nan dènye mwa yo, an patikilye nan lise yo --yon sitiyasyon ki soulve anpil pawòl-anpil sou fasilite ki genyen pou moun achte e vann zam Ozetazini.