Nan okazyon Jounen Mondyal Fanm yo, mekredi 8 mas 2018 la, Lavwadlamerik te pale avèk divès fanm ayisyèn kap travay pou fè yon diferans nan sosyete ayisyèn nan ou nan kominote nan Dyaspora kote yap viv la. Nan sèten ka, si nou pat pale avèk medam yo, nou te prezante pwogram kote nou te mete yo an valè oubyen pwojte limyè sou pwofil yo pou enfòmasyon ak edikasyon oditè ak telespektatè nou yo.
Pami dam ki te pale nan mikwo nou, genyen Madam Pascal Solages, kowòdonatris jeneral òganizasyon feminis Nègès Mawon. Madam Solages -ki se manm kabinè prive Minis Zafè Fanm ak Dwa Fanm ann Ayiti- te ban nou detay sou efò òganizasyon l la ap fè an favè respè dwa fanm ayisyèn yo avèk avansman yo nan sosyete a.
Nou te fè entèvyou tou avèk 2 fanm ki bay medam yo anpil fyète: Ekonomis Katie Flore Fils-Aimé, oun nan fanm ki te gen pis enfliyans ann Ayiti pou ane 2017 la, epi Johann Richard Adams ki te resevwa Pri AHP 2018 pou Espri Antreprenè poutèt siksè yon biznis li genyen online, Bebe Naturals, ki baze nan Washington.
Your browser doesn’t support HTML5
Entèvyou Jean Pierre Leroy ak Gaelle Bien-Aimé - 8 mas 2018
Nan okazyon Jounen Mondyal Medam yo, nou te brake limyè tou sou travay Gaelle Bien-aimé, yon komedyèn e jounalis ki te pati 10 fanm ki pi enfliyan ann Ayiti pou ane 2017 la. Mme Bien-Aimé, ki reponn kesyon Jean Pierre Leroy, te analize pou nou situasyon medam yo ann Ayiti ak kèk pwogrè ki fèt pou fè respekte dwa yo.