Anpil bis ki chaje ak elèv e ak etidyan ki te soti vivan nan yon fiziyad terib ki te fèt semèn pase a nan yon lise nan Eta Florid, pran direksyon kapital Eta a, Tallahassee, nan jounen madi 20 fevriye 2018 la, pou yo fè presyon sou manm Asanble Jeneral Florid la (palman Eta a) pou yo entèdi lavant fizi daso tankou sa ki te sèvi nan atak yon ansyen elèv lise a te lanse nn dat 14 fevriye e ki te touye 17 moun.
Tout elèv sa yo ap frekante Lise Parkland la (Marjory Stoneman Douglas High School); yo pran tèt yon mouvman lave-kanpe nasyonal pou denonse atak la. Sepandan li poko parèt klè si –kontrèman ak apèl moun te lasne apre masak menm jan an nan le pase-- demand yo a pral pouse palmantè Florid yo ak Senatè e Depite ameriken yo nan Washington adopte lwa ki pi sevè sou kontwòl zam Ozetazini.
Elèv yo gen plan òganize nan Washington D.C. nan dat 24 mas 2018 la, yon mach kap rele “Mach pou Lavi nou” avèk patisipasyon moun k ap sòti tout kote a travè peyi a. Evennman sa a deja jwenn apui vedèt mizik pòp tankou Justin Bieber, Lady Gaga ak Cher, tandiske aktè George Clooney ak madanm li, Amal --ki se yon avoka defans dwamoun-- anonse yo dispoze depanse $500,000.0l0 (5 san mil dola) pou yo peye pou òganizasyon mach sa a. Misye Clooney deklare:
<< Tout manm fanmi nou pral prezan nan dat 24 mas la pou n kanpe kòt-a-kòt ak jenerasyon jennmoun enkwayab sa yo k ap sòti toupatou atravè peyi a. >>