WASHINGTON, DC —
Ann Ayiti, seyans sena a te kòmanse sou rapò PetroCaribe a nan fen jounen mèkredi 31 janvye 2018 la, kote palmantè yo pase tout nwit la ap fè deba sou doye a, ranvwaye pou madi pwochen 6 fevriye a aprè Senatè Jean Marie Salomon ak kèk kòlèg li nan minorite a te deside abandone seyans la pou yo anpeche yon vòt fèt.
Senatè Salomon di rezon ki eksplike desizyon sa a, se le fèt ke palmantè ki nan majoritè a e ki pwòch pouvwa an plas la t ap chache boykote seyans la paske, daprè sa yo di, rapò komisyon anti-koripsyon an "pa resevab" nan Gran Kò a. Selon Misye Salomon toujou, senatè majoritè a te vle vote yon rezolisyon pou ranvwaye dosye a bay Kou Siperyè dè Kont san palman an pa mele ladan n.
Deba sa yo dewoule malgre yon pwofesyonèl nan kesyon dwa te depoze plent kont sa li rele "move jesyon fon PetroCaribe a." Vrèmanvre, Mèt Adré Michel, avoka opozisyon an, ki reprezante tou kèk oganizasyon militan nan sosyete sivil la, te anonse li ale nan tribinal apwopriye a pou l mande lajistis egzije ofisyèl gouvènman pase yo reponn kesyon sou disparisyon plizyè milyon dola nan Fon PetroCaribe a. Daprè Misye Michel, depi plent sa a devan otorite lajistis yo, palman an pa gen okenn dwa pou l pran yon desizyon sou dosye a.