Prezidan Etazini an, Donald Trump ak Prezidan Lachin nan, Xi Jinping reyafime angajman yo pou desitire zam nikleyè nan penensil koreyen an nan yon telefòn konvèzasyon 2 lidè te genyen vandredi 11 out 2017 la dapre yon nòt la Mezon Blanch pibliye.
Nòt la kontinye pou l di, 2 lidè yo pataje tou menm opinyon sou rezolisyon Konsèy Sekirite Nasyon Zini pran konsènan Kore di Nò e yon konsidere l tankou yon pa enpòtan e nesesè pou pote lapè ak estabilite nan penesil koreyen an. Nòt la di tou, Prezidan Trump ak Prezidan Jinping dakò lide pou Kore di Nò sispann ak pwovokasyon e ak konpòtman dezòdone li yo.
Yon avyon de gè, B-1B Lancer, kap rive nan Baz Fòs de Lè Andersen, nan Guam, 26 jiyè 2017, Foto koutwazi: U.S. Air Force.
Bonè nan menm jounen vandredi a, Prezidan Donald Trump te voye yon avètisman bay Kore di Nò kote li mete li an gad kont tout pwovokasyon ki ka debouche sou yon gè.
Prezidan Trump di: “….Nou pare pou n aji si Kore di Nò ta gen male poze yon aksyon moun fou. Men m espere prezidan Kim Jong Un va chwazi yon lòt chemen..."
Prezidan ameriken an, Donald Trump, lanse yon lòt avètisman bay Kore di Nò pou di peyi azyatik sa a lame amerikèn nan byen ame e li deja pran pozisyon pou l reponn kif-kif si peyi azystik sa a pwovoke yon lagè ak Lèzetazini. Nan yon mesaj Prezidan Trump pibliye byen bonè vandredi 11 out la sou kont Twitter li, li deklare :
“Nou deja mete an plas tout solisyon militè nou yo; zam nou yo byen chaje e yo an pozisyon pou n aji si Kore di Nò ta gen malè poze yon aksyon moun fou. Men m espere Prezidan Kim Jong Un va chwazi yon lòt chemen."
Lidè ameriken an lanse avètisman sa a kèk èdtan aprè Lachin te di li pa pral pote okenn èd bay Kore di Nò si se peyi sa a ki lanse premye atak la kont tèritwa ameriken an e si Lèzetazini ba li yon repons kif-kif.
Pandansetan, pawòl piman bouk chofe kap pale ant Lèzetazini ak Kore di Nò yo soulve kè-sote anpil kote sou latè, kòmkwa le mond pral konnen yon gwo konfli; e tout bri sa yo gen yon eko espesyal nan Kore di Sid. Peyi sa a gen yon fwontyè avèk Kore di Nò e tou lè 2 eta yo rasanble anpil gwo zam lou nan zòn nan.
Depi kèk tan deja, pi fò moun nan Kore di Sid ap viv anba danje lagè. Kore di Nò menase plizyè fwa pou l fè kapital Kore di Sid la, Sewoul, tounen yon lanmè dife e li plase bò fwontyè a anpil gwo pyès kanno ak lòt gwo zam lou. Men nan Kore di Sid, sa preske pa etone moun yo ankò, paske depi 60 lane tou le 2 peyi yo gen zam ki fè youn pa pran chans atake lòt.