Nan Larisi, Ministè Defans la pale nan jounen madi 27 desanm 2016 la, pou l di ekip rechèch yo rive jwenn prensipal bwat nwa yon avyon pasaje militè ris ki te tonbe nan Lanmè Nwa a weekend pase a.
Pòtpawòl Ministè Afè Etranjè Larisi a, Maria Zakharova.
Dapre divès ajans nouvèl nan Larisi, yo pral transpòte bwat nwa a nan kapital la, Moskou, pou analiz nan moman anketè yo ap chache konnen kisa k te lakoz aksidan an. Otorite ris yo deklare yo pa ekate posiblite pou se teworis ki ta pwovoke aksidan an ki te rive dimanch 25 desanm nan; men yo ensiste pou di posiblite sa a mens anpil-anpil.
Tou lè 92 moun ki te abò aparèy la (yon avyon mak TU-154 ki te de sèvis depi 33 zan) peri nan aksidan an. Ministè Defans la ajoute, sòti dimanch pou rive nan kòmansman jounen madi a, chèchè yo jwenn 12 kadav avèk plizyè moso kò nan lanmè a.
Lendi 26 desanm nan, Ministè Zafè Dijans la ta anonse gen 45 bato ak 135 dayiva ki sòti toupatou nan Larisi kap patisipe nan rechèh yo; jiskaprazan yo jwenn divès pati avyon an sou yon distans yon kilomèt edmi ak plaj la e sou yon pwofondè 25 mèt anba lanmè a.