W —
Prezidan ameriken an, Barack Obama, deklare li fè yon chita-pale trè pozitif ak kòlèg ris li a, Vladimir Putin, sou sitiyasyon an nan peyi Siri; men 2 pati yo genyen yon gwo wout toujou pou yo travèse anvan pou yo jwenn yon akò-seselfe ki ta ka pèmèt plis asistans imanitè antre nan Siri.
Misye Obama pale konsa lendi 5 septanm 2016 la nan yon konferans pou laprès kote li te abòde yon gwo lis sijè nan fèmti Somè G-20 an nan vil Hangzhu nan Lachin. Lidè ameriken an fè rankont sa a ak laprès aprè chita-tande li ak Misye Putin.
2 lidè yo diskite, daprè laprès, sou sa yo konsidere kòm yon "veritab kanpo nan ostilite yo"; sepandan Prezidan Obama di sa pral mande kèk negosyasyon difisil etandone mank konfyans ki egziste ant Moskou ak Washington.