Yon majorite pami senatè brezilyen yo vote pou revoke Prezidan Dilma Rousseff sou aklizasyon deske li te vyole lwa peyi a sou bidjè Leta. Vòt sa a dewoule nan mitan jounen mèkredi 31 out 2016 la apre Madam Rousseff --premye fanm ki monte prezidan peyi a-- te pase 14 zèdtan ap reponn kesyon palmantè Gran Kò a nan jounen lendi a. Ekip avoka defans la ak gwoup avoka akizasyon an te pase jounen madi a ap prezante agiman final yo.
Patizan Prezidan Rousseff ki tap enstale yon baryè anflame kòm barikad pou yo bloke ri prensipal ki antoure yon gwo stad nan vil Sao Paulo, o Brezil, pou denonse jijman ki ta pral debouche sou revokasyon Prezidan an..
Sou 81 senatè, 61 vote “WI” epi 20 vote “NON” pou Revoke Prezidan Rousseff, alòske 54 vwa sèlman te nesesè pou vòt la pase. San di pètèt se Vis Prezidan an, Michel Temer, ki pral tounen pwochen prezidan brezilyen an. Palmantè ki te apiye pwosè a akize Prezidan Rousseff deske li ta sèvi ak lajan li te pran nan kont-Leta pou l te kouvri defisi bidjè gouvènman an nan yon efò pou l te kore popilarite li nan moman Brezil tap pare pou eleksyon prezidansyel nan lane 2014; epi li te fè tout sa li te kapab pou li kase fèy, kouvri sa.
Nan jounen lendi 29 out la, Prezidan an te pran lapawòl pandan 30 minit devan senatè yo pou l te defann administrasyon n nan. Li te akize opozan l yo deske yo vini ak pwosè sa a pou ba l yon koudeta epi bloke pwogrè demokrasi brezilyèn nan reyalize.