Chantè-konpozitè lejandè meksiken Alberto Aguilera Valadez --ki popilè sou non Juan Gabriel-- mouri nan jounen dimanch 28 out 2016 la tou prè vil Los Angeles nan Eta Kalifòni, Ozetazini. Li te gen 66 an. Daprè jounalis meksiken Joaquin Lopez Doriga, atis san parèy sa a mouri viktim yon atak kadyak kèk èdtan aprè li te fin anime yon espektak nan Los Angeles kote tout tikè te vann davans.
Juan Gabriel ki tap bay yon pèfòmans nan okazyon remiz Pri Grammy Latino-Ameriken an nan vil Las Vegas, Eta Nevada, Ozetazini, nan dat 5 novanm 2009.
Juan Gabriel te kòmanse gen popilarite nan ane 70 yo kom yon chantè gran panpan pou jan li te konn abiye ak jan li te kon evolye sou sèn nan dabò nan peyi natal li, Meksik, epi ansuit nan rès mond la. Li vann pandan karyè li plis pase 100 milyon albòm nan Amerik Latin nan, nan peyi Lespay ak nan kominote ki pale panyòl Ozetazini. Youn nan pi gwo hit li se yon chanson ki gen pou tit “Querida”, ki vle di “Cheri Kòkòt” e ki te rete nan tèt hit parad meksiken an pandan plis pase yon lane.
Fanatik ki reyini devan pòt kay Juan Gabriel, nan vil Juarez, nan pati nò Meksik, apre yo te fin pran nouvèl lanmò li.
Yo te entwodui Juan Gabriel nan Galri Atis Renome mizik latino-amerikèn nan an 1996, swa yon lane apre Sosyete Amerikèn Konpizitè, Otè ak Enprimè yo (abreje anglè ASCAP) te nonmen li konpozitè ak pawolye de lane. An 2009 li te gen lonè wè yo enstale yon etwal nan non li sou Boulva Hollywood la nan Kalifòni.
An 1990, Juan Gabriel te tounen premye atis mizik pop ki prezante yon pèfòmans nan Palè dè Bo Za vil Meksiko a kote se espektak mizik klasik sèlman yo te prezante jiskela. Prezidan meksiken an, Enrique Pena Nieto, ekri sou kont Twitter li nan jounen dimanch la pou l di:
“Juan Gabriel se youn nan pi gwo icon mizik peyi a… yon vwa ak yon talan ki te prezante Meksik ak mizik li devan lemond yon fason ekstwòdinè. Ou ale twò bonè. Repoze w an pè.”