Konsèy Elektoral Pwovizwa a envite 54 kandida ki te patisipe nan eleksyon prezidansyèl oktòb 2015 yo, konfime patisipasyon yo nan premye tou eleksyon KEP a ap refè nan dat 9 oktob 2016 la. Daprè direkè kominikasyon konsèy a, Richardson Dumel, kandida konsène yo dwe prezante an pèsonn nan Biwo Depatmantal Wès 1 an sòti 8 pou rive 22 jen 2016.
Your browser doesn’t support HTML5
Nouvèl Ayiti pou jedii 9 jen 2016 la
Depatman Deta ameriken, ki reyaji apre piblikasyon kalandriye elektoral la, di Lèzetazini regrèt desizyon Konsèy Elektoral Pwovizwa a pran pou l relanse pwosesis elektoral la a pati de premye tou eleksyon prezidansyèl la. Pòtpawòl adjwen Depatman Deta a, Marc Toner, di desiyon sa a kapab genyen konsekans negatif sou plan ekonomik la nan yon moman kote Lèzetazini ak lòt patnè Ayiti yo ap tann enstaslyonyon nouvoprezid eli pou yo ranfòse èd peyi a bezwen pou li fè fas ak defi ki devan li yo.
Reprezantan wo-plase Inyon Ewòp la, Federica Mogherini, pibliye yon kominike kote li di:
"Misyon Obsèvasyon Elektoral Inyon Ewòp la, ki nan peyi dAyiti depi jiyè 2015, fè konnen desizyon KEP a pran pou l refè eleksyon prezidansèl yo se yon desizyon ki kontrè ak rezilta obsèvasyon misyon an te fè sou dewoulman eleksyon 25 oktòb 2015 la.
Kòm konsekans, obsèvatris an chèf misyon an, depite ewopeyèn Madam Valenciano, estime kondisyon yo pa reyini pou misyon obsèvasyon Elektoral Inyon Ewòp la kontinye aktivite l nan peyi a. Poutèt sa, aprè mwen fin pran kontak ak obsèvatris an chèf la, mwen deside mete fennanmisyon an."
Yon lòt kote, Senatè Andris Riche mande Prezidan Jocelerme Privert prezante devan asanble nasyonal la nan dat l3 jen kap vini la a pou l konnen si wi ou non palmantè yo ap pwolonje manda li oubyen si yap mete fen nan misyon li kom lidè tranzisyon politik la. Yon apèl menm jan an sòti bò kote Depite Abel Descollines, ki se premye sekretè Chanm Bas la. Yon delegasyon palmantè ap rankontre ak Prezidan Privert pandan jounen jedi 9 jen an pou yo diskite sou direksyon peyi a ap pran apre 13 jen, dat kote manda Misye Privert ap pran fen.
Anfen, etidyan IERA ak INAGHEI te boule kawotchou nan Pòtoprens epi yo te bloke divès ri nan vil la mekredi 8 jen an pou yo egzije aplikasyon Dekrè 17 Me 2005 la ki prevwa fason pou otorite yo anplwaye moun nan administrasyon piblik la.