Plizyè manm palman ayisyen an leve lavwa pou di Prezidan Jocelerme Privert dwe kite pouvwa a pa pi ta 14 jen 2016 la jan Akò 5 Fevriye 2016 la prevwa l la: pa yon grenn jou an plis. Pami palmantè sa yo genyen Senatè Carl Murat Cantave ki di 14 jen se fen delè Misye Privert genyen pou li mete fen nan misyon li kòm lidè pwovizwa e palman an pa gen okenn rezon pou l ta bay prezidan an yon pwolongasyon. Misye Cantave di prezidan an echwe nan misyon li, paske li pa òganize eleksyon nan dat akò a te prevwa a (24 avril 2016) e li pa fè sa k te nesesè pou yon nouvo chèf deta prete sèman nan dat 14 me 2016 la, pou l site rezon sa yo sèlman.
Your browser doesn’t support HTML5
Nouvèl Ayiti pou jedii 2 jen 2016 la
Yon nòt pou laprès ki sòti nan biwo pòtpawòl Sekretè Jeneral Oganizasyon Nasyon Zini an, Ban Ki-moon, chèf l'ONU an di li pran nòt de piblikasyon rapò sou verikasyon pwosesis elektoral la ann Ayiti. Sekretè Jeneral la atire atansyon sou le fèt ke lap trè difisil pou Ayiti pran chans rete ak yon gouvènman tranzisyon pwolonje. Li note tou, avek kè-sote, konsekans negatif sitiyasyon sa a kapab genyen sou angajman kominote entènasyonal la vizavi Ayiti.
Yon lòt kote, prezidan Chanm Bas la, Cholzer Chancy --ki bay Lavwadlamerik pozisyon ofisyèl depite yo sou rapò komisyon evalyasyon ak verifikasyon elektoral la e sou rekòmandasyon komisyon an-- deklare Lachanm pran distans li ni ak komisyon prezidansyèl la ni ak rekòmandasyon li fè yo paske, daprè li, kreyasyon komisyon an sete yon desizyon enkonstitisyonèl. Misye Chancy -ki reponn kesyon Ronald César-- ajoute genyen konsekans legal pou manm komisyon an si yo poze aksyon ki pa ann akò preskri manman-lwa peyi a.
Anfen, Senatè Jean Renel Sénatus, prezidan komisyon jistis ak sekirite nan Gran Kò a, leve lavwa kont plizyè desizyon komisè gouvènman Pòtoprens la, Mèt Danton Léger, pran pou li enpoze, antwòt, entèdiksyon depa kont plizyè ansyen ofisyèl. Minis Jistis la, Camille Edouard Junior --ki se pi gwo otorite lajistis nan peyi a-- te gen pou l prezante devan komisyon an jedi 2 jen 2016 la pou l reponn kesyon senatè yo sou dosye a. Avan depozisyon sa a fèt, otorite lajistis yo pran desizyon, nan jounen mèkredi premye jen an, pou yo leve entèdiksyon depa Mèt Léger te pran kont ansyen ofisyèl yo.