Apre plis pase 48 tè sispens, se yon rapò akablan Komisyon Endepandan Evalyasyon ak Verifikasyon Eleksyon 25 oktòb 2015 la remèt Prezidan Jocelerme Privert nan apre-midi jounen lendi 30 me 2016 la nan palè nasyonal la, nan Pòtoprens.
Your browser doesn’t support HTML5
Nouvèl Ayiti pou madi 31 me 2016 la
Nan yon ekspoze manch long, prezidan komisyon an, François Benoît, prezante pwen pa pwen yon rezime rapò a ansanm ak yon lis detaye tout vyolasyon, iregilarite ak fwod ki te genyen nan eleksyon an. Nan ankèt ak analiz komisyon an fè sou done komisè yo te jwenn nan Sant Tabilasyon an, li dekouvri anpil sa k pa sa ki te fèt. Devan prèv klè ki montre koken ki te karakterize pwosesis la, Misye Benoît mande gouvènman an ak Konsèy Elektoral Pwovizwa a redemare tout pwosesis elektoral la a zewo --omwen nan nivo eleksyon prezidansyèl la.
Msye Benoît di li espere responsab yo va teni kont de rekòmandasyon yo e aplike yo pou eleksyon ka fèt nan transparans e rebay pèp ayisyen an konfyans nan avni li e sitou konfyans nan dwa li pou l patisipe nan zafè peyi li.
Prezidan pwovizwa a, Jocelerme Privert, ki remèt rapò a bay prezidan KEP a Leopold Berlanger, di li swete peyi d Ayiti va gen yon nouvo prezidan nan komansman ane 2017 la.
-------------------------------------------------------------------------------
Ansyen kandida a la prezidans Clarens Renois di se responsabilite gouvènman, Konsèy Elektoral Pwovizwa a ak lòt pati konsène pou yo deside si wi ou non y ap aplike rekòmandasyon komisyon Evalyasyon ak Verifikasyon Elektoral la.
Anfen, sekretè jeneral pati politik Oganizasyon Pèp kap Lite (OPL), pwofesè Sauveur Pierre Etienne, pa dakò ni ak konklizyon ni ak rekòmandasyon komisyon verifikasyon elektoral la fè sou rezilta eleksyon 2015 la. Daprè Misye Pierre Etienne, rapò a chaje ak sa li rele enkoyerans.