Travay komisyon evalyasyon ak verifikasyon elektoral la ann Ayiti ap vanse nan sant tabilasyon an. Mèkredi 25 me 2016 la, lapolis syantifik nan DCPJ te travay sou verifikasyon enprent yo epi teknisyen komisyon an ap verifye pwosè vèbal ki te an karantèn yo, daprè pòtpawòl komisyon an Jean Gédéon.
Reprezantan pati politik k ap obsève travay komisyon elektoral la, sou bò pa yo, di yo konstate te gen koken nan eleksyon prezidansyèl 25 oktòb2015 la. Reprezantan yo di yo jwenn prèv ki pwouve koken sa yo apati de travay polis syantifik DCPJ yo fè sou verifikasyon anprent yo nan pwosè vèbal yo.
Your browser doesn’t support HTML5
Nouvèl Ayiti pou jedii 26 me 2016 la
Polis Nasyonal d Ayiti, PNH prezante yon bilan sou ensekirite a pou 3 denye mwa yo. Pòt pawòl PNH la, Frantz Lerebourg, fè konnen lapolis te mete men sou 13 prezime bandi nan Kwadèboukè, nan antre lès Pòtoprens. Pi lwen, li presize estatistik sou ka anlèvman ak asasina yo diminye anpil nan peyi a pandan menm peryòd la.
Yon lòt kote, ansyen minis sante piblik ak popilasyon Florence Duperval Guillaume reponn kesyon komisyon etik ak anti-koripsyon sena repiblik la nan jounen mekredi 25 me 2016 la sou fason li te jere fon Petwo Karibe a. Ansyen minis la fè konnen sektè sante a pat tèlman benefisye de fon lajan Petwo Karibe a. Sepandan prezidan komisyon an, Senatè Youri Latortue, fè konnen li konstate anpil anomali nan egzekisyon kèk kontra ansyen minis Duperval Guillaume te siyen.
Anfen, Fowòm Politik Fanm --yon òganizassyn kap defann dwa medam yo pou yo gen plas yo nan palman ayisyen an-- mete sou pye yon karavann kap vizite diferan vil Ozetazini pou chache apui pou koz yap defann nan peyi yo. Aprè New York, Miami, Atlanta ak Washington D.C., karavann nan gen pou l vzite divès lòt vil tankou Boston ak Chicago, pa egzanp. Sèvis Kreyòl Lavwadlamerik la jwenn plis detay nan yon entèvyou avèk prezidant fowòm nan, Claire François Duvigneau, ak yon manm gwoup la, Barbara Guillaume.