Prezidan pwovizwa ayisyen an, Jocelerme Privert, pwomèt li pral chwazi yon Premye Minis semèn sa a, dapre akò pouvwa egzekitif la ak pouvwa lejislatif la te siyen nan dat 5 fevriye 2016 la. Korespondan nou Renan Toussaint di nou chèf deta a pran angajman sa a nan weekend nan pandan yon vizit li t ap fè nan pwovens natal li, Depatman Nip. Palman an gen pou l apwouve chwa nouvo chèf gouvènman enterimè ki pral ranplase Evans Paul la.
Your browser doesn’t support HTML5
Nouvèl Ayiti pou lendi 22 fevriye 2016 la
Yon lòt kote Prezidan Privert, ki t ap prezante yon bilan sou sitiyasyon finansye peyi a, pwopoze yon rediksyon nan kantite ministè yo pou peyi a kapab fè ekonomi. Lidè ayisyen an lanse yon apèl bay Premye Minis enterimè a, Evans Paul, pou mande l pa ni nonmen ni enstale manm gouvènman an ke administrasyon Martelly a te nonmen avan li te kite pouvwa a nan dat 7 fevriye 2016 la. Prezidan an, ki poko fin rankontre ak klas politik la sou chwa nouvo Premye Minis la, gen pou l fè konsiltasyon sou kesyon an ak prezidan 2 chanm yo.
Anfen, Polis Nasyonal d Ayiti (PNH) prezante rapò li sou diferan aktivite enstitisyon an mennen pandan 30 jou ki pase yo. Pòtpawòl adjwen PNH la, Garry Desrosiers, di ajan-d-polis yo te sezi plizyè zam e yo fè plizyè arestasyon. Misye Desrosiers ajoute fòs de lòd yo kontinye ap chache plizyè moun yo sispèk ki te patisipe nan yon seri de krim pandan mwa pase yo -pami yo yon polisye ki blese ak manchèt nan yon biwo dwann nan Plato Santral la.