Ann Ayiti, Prezidan a.i. Sena a, Ronald Larèche, di lap tann nouvo chèf deta a kòmanse fè konsiltasyon sou chwa yon Premye Minis konsansis dapre akò Pouvwa Egzekitif la ak Pouvwa Lejislatif la te siyen nan dat 5 fevriye pase a. 2 palmantè Depatman Plato Santral la (Senatè Franciso de la Cruz ak Depite Abel Descollines) eksprime opinyon ki apiye pozisyon Prezidan a.i. Sena a.
Your browser doesn’t support HTML5
Nouvèl Ayiti pou madi 16 fevriye 2016 la
Kowòdonatè Platfòm Altenativ pou Pwogrè ak Emansipasyon Haiti, LAPEH, e ansyen senatè Jean-Hector Anacasis, ki reyaji aprè eleksyon Prezidan Pwovizwa Jocelerme Privert, di nouvo premye minis konsansis la ta dwe sòti swa nan opozisyon an, swa nan sektè prive a oubyen ankò nan sektè defans dwamoun nan.
An plis de chwa yon nouvo Premye Minis, Prezidan Privert gen pou l mete sou pye yon konsèy elektoral pwovizwa a, plis yon komisyon evalyasyon elektoral ki pral chache konnen kisa ki te pase nan eleksyon 9 out ak 25 oktòb 2015 la. Misyon nouvo KEP sa a se òganize eleksyon jeneral nan dat 24 avril pwochen. Plizyè sektè fè konnen delè 120 jou akò 5 fevriye a bay nouvo konsèy la pou l mete eleksyon yo sou pye, kapab pa ase.
Manm kominote entènaysonal la byen akeyi eleksyon Prezidan Pwovizwa ayisyen an, Jocelerme Privert. Yo ensiste an menm tan sou nesesite pou nouvo dirijan yo aplike tout akò 5 fevriye a pou konplete pwosesis elektoral ki te kòmanse an 2015 la. Anfen, Pati Fuzyon Sosyo-Demokrat yo -ki gen nan tèt li ansyen senatris Edmonde Supplice Beauzil-- pa dakò ak fason palman an te eli Senatè Jocelerme Privert kòm nouvo prezidan pwovizwa a.