Nan Ondiras, yon jij satisfè yon demand Lèzetazini te fè pou lajisjis peyi a ekstrade Ozetazini ansyen Prezidan Juan Orlando Hernandez, pou l fè fas ak akizasyon dèske li te mele nan trafik dwòg ak move itilizasyon zam. Jij la pran desizyon an mèkredi 16 mas la, swa yon mwa aprè otorite ondiryen yo te arete ansyen prezidan an lakay li nan Tegisigalpa. Orlando Hernandez rejte tout akizasyon yo e li gen dwa ale ann apèl ak vèdik la.
Dapre sa k di nan demand ekstradisyon Etazini an, depi 2004, ansyen prezidan an te pèmèt plizyè tòn kokayin ki te sòti Venezuela ak Kolonbi pase pa Ondiras sou wout pou Etazini, tandiske li te pwoteje tratikan dwòg yo kont lajistis pou l te ka resevwa kout lajan anba tab ki te monte rive plizyè milyon dola.
Orlando Hernandez te enplike plizyè fwa kòm ko-konspiratè nan jijman yon frè li pou trafik dwòg ki te dewoule an 2019 nan vil New York. Lajistis te jwenn frè a, ki rele Juan Antonio “Tony” Hernandez, koupab pou trafik dwòg ak zam e yo te kondane li pou l pase rès vi li nan prizon
Kèk nan enfòmasyon ki nan atik sa a sòti nan Associated Press ak Reuters.