Fèt 4 Jiyè a Ozetazini bay prèv ke Ameriken reprann foli vwayaje kounyea ke pandemi ki te kòmanse an 2020 an diminye.
Nouvo chif ki fèk parèt montre gen 2.49 milyon pasaje ki te pase nan tchèk sekirite nan ayewopò Ameriken yo Vandredi. Chif sa a depare rekò ki te anrejistre semèn pase a, ki te 2.46 milyon.
Ogmantasyon sa a se dènye siy ki montre moun kap vwayaje pou pran plezi yo pa kite pri biyè yo ki ogmante ni kowonaviris la ki kontinye pwopaje, ni kè sote pou reta ak anilasyon vòl anpeche yo met deyò.
Yon lòt endikasyon se ke kantite pasaje ayewopò Ameriken yo anrejistre nan semèn ki pase yo prèske rive nan nivo yo te anrejistre an 2019.
Enfomasyon pou repotaj sa a soti nan Associated Press
