Mwayen Oryan
Vizit Biden nan Mwayèn Oryan an Vize Rasire Lidè yo
Prezidan Joe Biden mete fen nan vire won 4 jou li tap fè nan Mwayèn Oryan an.
Men anvan li te mete pye nan Arabi Saoudit, Biden te konnen tap gen pwoblèm. Li te riske anpil kritik lè li te deside vizite li te sèmante pou'l trete tankou "pariah" poutèt vyolasyon dwa moun ki komèt la, e ke pat gen okenn garanti vizit la tap debouche sou yon ogmantasyon pwodiksyon petwol pou soulaje pri gazolin sou mache a.
Biden te deside fè fas ak kritik sa yo kanmenm, ak espwa li tap kapab pwofite vizit la pou'l repare relasyon ant Etazini ak peyi sa yo.
Li te eseye voye yon mesaj klè bay lidè Arab yo ke Etazini kontinye pran angajman vizavi sekirite yo ak stabilite rejyon an.
See all News Updates of the Day
Trump Mande Jòdani, Ejipt Pran Palestinyen yo
Plizyè milye Palestinyen kanpe devan barikad pou tounen lakay yo nan nò Gaza Dimanch. Yo eksprime fristrasyon yo apre Izrayèl akize Hamas dèske li vyole ako seselfe a epi refize louvri pwen tranzit yo.
Yon jou apre dezyèm boukantay otaj Izrayelyen Hamas te kenbe nan Gaza pou prizonye Palestinyen ki te fèmen nan prizon Izrayelyen yo, blokaj la te souliyen risk ki poze pou trèv la.
Anvwaye Prezidan Donald Trump pou Mwayèn Oryan an, Steve Witkoff, pral vwayaje Izrayèl Mèkredi pou jere seselfe Gaza a, dapre sa rezo televizyon Channel 13 Izrayèl la rapote Dimanch. Nouvèl la site 2 responsab Izrayelyen.
Nan rejyon santral Gaza, plizyè kolònn moun tap tann sou wout prensipal ki ale nan nò a. Te gen machin epi pyeton, dapre sa temwen yo rapote.
Samdi Trump te pase lòd pou lame Etazini bay Izrayel bonm ki peze 2,000 liv ke predesesè li Joe Biden te pase lòd pou yo kenbe e pa livre bay Izrayèl akoz kè sote li te genyen pou enpak sa taka genyen sou popilasyon sivil Gaza a.
Premye Minis Izrayelyen Benjamin Netanyahu remèsye Trump pou "zouti li bay ke Izrayèl bezwen pou defann tèt li, konfwonte emi komen yo epi sekirize yon avni lapè ak pwosperite."
Trump te lanse apèl tou bay Ejipt ak Jodani pou yo pran lakay yo plis Palestinyen ki soti Gaza swa pwovizwaman, swa an pèmanans. Li te ajoute: "Nou ta dwe netwaye tout (teritwa a)."
Trump kontinye pou l di: "(Gaza) literalman yon lye demolisyon, prèske tout bagay ratibwaze e moun yo ap mouri lòt bò a." Li te fè deklarasyon an apre yon konvèsasyon nan telefòn ak Wa Jòdani Abdullah.
Yon responsab Hamas, gwoup militan Palestinyen ki dirije Gaza te reponn pou di li gen kè sote tou dèske yap eseye dechouke Palestinyen yo an pèmanans pou yo pa janm tounen lakay yo.
Basem Naim, yon manm biwo politik Hamas la di Reuters: Palestinyen yo "pap janm aksepte okenn òf ni solisyon, menm si (òf sa yo) sanble fèt ak bon entansyon anba degizman rekonstriksyon jan yo anonse l nan pwopozisyon Prezidan Etazini Donald Trump yo."
Anpil nan Palestinyen ki bloke dèyè barikad sou wout ki mennen nan nò Gaza rejte solisyon Trump pwopoze a tou.
Yo di: "Si li konprann li pral dechouke pèp Palestinyen an pa lafòs, eben se enposib, enposib, enpposib. Pèp Palestinyen an kwè ak tout fòs li ke tè sa se pou li li ye, se tè pa yo, se tè pa yo."
Macron Sipliye Netanyahu Pou l 'Retire Fòs li yo nan Liban'
Prezidan fransè a Emmanuel Macron Dimanch 26 janvye a te mande Premye Minis Izrayelyen an pou l "retire fòs li yo ki toujou prezan nan Liban"
Se Biwo prezidan an ki te soti nòt sila, kote yo di ke 2 lidè yo te pale nan telefòn.
Nan nòt la Palè Elysee a di:"Prezidan Repiblik la te ensiste bay Premye Minis la enpòtans pou asire ke anyen pa konpwomèt efò nouvo otorite Libanè yo fè pou retabli otorite eta a sou tout teritwa peyi yo."
Lamezonblanch Apwouve Bonm ki Peze 2,000 Liv Pou Izrayèl dapre Axios
Lamezonblanch pase lòd bay lame Etazini pou l leve ola li te enpoze sou livrezon bonm ki peze 2,000 liv pou Izrayèl dapre yon rapo Axios pibliye Samdi ki site 3 responsab Izrayelyen.
Se yon mezi anpil moun te atann. Biden te kanpe livrezon bonm yo akoz kè sote li te genyen sou enpak yo taka genyen nan konfli Gaza a ki te tanmen apre atak Hamas te lanse kont Izrayèl 7 Oktòb 2023.
Hamas Libere 4 Sòlda Fanm Izrayelyen an Echanj pou 200 Prizonye Palestinyen
Gen 4 sòlda fanm Izrayelyen ke Hamas te kidnape epi mennen Gaza ki retounen lakay yo apre militan Hamas yo te parade yo devan yon foul plizye milye moun epi remet yo bay La Kwa Wouj.
Apre sa, Izrayel te libere 200 prizonye Palestinyen Samdi nan dezyem boukantaj ki fèt nan kad seselfe frajil la.
Hamas te eseye montre yon lòt fwa ankò ke li toujou gen kontwòl Gaza apre 15 mwa lagè.
Nan premye kriz seselfe a, Izrayèl te di li patap kite refije Palestinyen yo tounen nan no Gaza jan yo te prevwa l Dimanch.
Izrayèl di yon otaj sivil ke yo te sipoze lage, ki rele Arbel Yehoud, poko libere.
Prens Eritye Arabi Sawoudit la Gen Entansyon Envesti 600 Milya Dola Ozetazini
DUBAI, Emira Arab Ini (AP) — Prens eritye Arabi Saoudit la di li vle envesti 600 milya dola Ozetazini pandan 4 ane kap vini yo. Li te pran desizyon saa apre Prezidan Donald Trump te anonse nan biwo Oval la li gen entansyon retounen nan wayòm wahabit la, nan kad premye vwayaj li nan peyi etranje.
Deklarasyon Prens Mohammed bin Salman nan, ke ajans nouvèl leta sawoudyen an te rapòte byen bonè jedi a, te fèt pandan prens la tap pale nan telefòn ak prezidan Donald Trump.
Lendi apre li te fin prete sèman, Trump te pale sou posiblite pou l ale nan Arabi Sawoudit ankò kòm premye vwayaj li aletranje, menm jan li te fè sa an 2017.