Misye Stone, di li pa t mele ditou nan swa-dizan mank e melanj ki ta fèt ak Larisi konsènan eleksyon prezidansyèl ane 2016 la.
Konsiltan politik ameriken Roger Stone, ki asosye depi lontan ak Prezidan Donald Trump, fè konnen li pa t mele ditou nan swa-dizan mank e melanj ki ta fèt ak Larisi e ki ta gen rapò ak eleksyon prezidansyèl ane 2016 la. Misye Stone pale konsa madi 26 septanm 2017 la anvan li te prezante devan komisyon sèvis sekrè Chanm dè Reprezantan an pou l te fè depozisyon li sou dosye a.
Nan yon deklarasyon konsiltan politik la pibliye anvan ouvèti sesyon an ki dewoule ak pòt fèmen, li di li kwè li klè yon peyi etranje te fè konbinezon ak yon ekip kanpay prezidansyèl; men dapre li se anketè ki dwe tcheke ak peyi Ikrèn e ak kandida Demokrat la, Hillary Clinton.
Misye Stone ajoute li pa t konnen davans kilès ki te remèt imèl òganizasyon nouvèl an-liyn WikiLeaks te pibliye ni ki dat kourye elektwonik sa yo te gen pou sòti. La a konsiltan politik la t ap pale de imèl ansyen direktè kanpay Hillary Clinton nan, John Podesta. Misye Stone fini pa di li pat janm mele nan okenn aktivite illegal nan non kliyan li yo.