Prezidan ameriken an, Donald Trump, di li konsidere yon rankont li fè nan wikenn nan avèk lidè Kore di Nò a, Kim Jong Un, kòm "yon kontak trè pozitif" e, daprè li, tou lè 2 peyi yo "vle rezoud pwoblèm ki poze antre yo."
Misye Trump, ki t ap pale avèk mannm pèsonèl militè ameriken ki baze sou baz ayeryèn OSAN, nan Kore di Sid, kontinye pou l di: “Mwen mete aksan sou gwo pwosperite k ap tann Kore di Nò lè nou va fin regle tout bagay nèt.”
Lidè ameriken an ensiste sou posiblite ki genyen pou Kore di Nò tire gwo benefis ekonomik si li aksepte akò Lèzetazini pwopoze sou pwogram nikleyè li a.
Donald Trump pale konsa aprè li fin tounen premye lidè ameriken an fonksyon ki vizite Kore di Nò lè li te travèse sou pati nò-koreyen zòn demilitarize a. Aprè Misye Trump te bay Kim Jong Un yon ponyen-men nan vilaj Panmumjon, li te travèse zòn demakasyon militè ki separe 2 Kore yo. Ansuit yo tou lè 2 te re-travèse liyn separasyon an pou yo retounen nan Kore di Sid. La, Misye Kim te di Donald Trump:
“Se yon gwo plezi pou m wè w ankò. Mwen pa t janm espere nou t ap janm rankontre nan zòn kote nou ye la.”
Prezidan Trump te reponn:
“Se yon gwo onè pou mwen le fèt ke m te kapab travèse liyn sa a.”
Anvan fen rankont la, Prezidan Trump envite Misye Kim Ozetazini pou yon lòt fasafas.