Ozetazini, sondaj ki fèk parèt montre kandida a la prezidans Pati Demokrat la, Hillary Clinton, genyen yon ti avans tou mens sou kandida Pati Repibliken an, Donald Trump, yon semèn anvan dewoulman eleksyon an.
Sepandan, anons Biwo Ankèt Federal la (FBI) fè pou l di li pral relouvri yon ankèt sou le fèt ke Madan Clinton te sèvi ak yon sistèm kominikasyon elektwonik prive pou l resevwa e voye kourye elektwonik ofisyèl lè te Sekretè Deta, sa vin lage yon dout sou kesyon pou konnen ki moun ki pral ranpòte kous pou La Mezon Blanch la
Vrèman vre, anpil sondaj ki parèt lendi 31 oktòb 2016 la montre Madan Clinton genyen yon avans ant 1% e 3% sou Misye Trump, yon ajan imoblye ki fè milyon nan zafè vann ak achte kay. Sepandan kèk sondaj montre mesyedam yo twouve yo egal-ego nan anpil Eta ki enpòtan pou kous ki pral debouche sou eleksyon 45èm prezidan ameriken an.
Anfen, gen sondaj ki toujou montre kandida demokrat la byen lwen devan, sètadi yo fè wè Hillary Clinton toujou byen plase pou l tounen premye fi ki dirije pi gwo puisans nan lemond la.