Yon pòt pawòl òganizasyon Nasyon zini deklare nan yon konferans pou laprès mèkredi 2 oktòb la: si sitiyasyon aktyèl la kontinye ann Ayiti, sa kapab vin pi konplike pou mounn ki te deja ap fè-fas ak ensekirite alimantè yo.
Pòt Pawòl fè konnen ensidan sou plan sekirite ak barikad ki bloke rout yo kontrarye pwogram imanitè LONU yo ak pwogram imanitè ONG yo.
Pòt-pawòl la di: kòlèg li yo fè konnen sektè sante a se sektè ki sibi plis enpak, nan moman kote plizyè lopital ap fè-fas ak gro defi pou yo fonksyone. Li ajoute: rarte gaz la, mank dlo potab ak mank lòt pwodwi esansyèl gen yon enpak sou òfelina yo. Inite pwoteksyon sivil la ak lòt sèvis irjans yo ap fonksyone ak yon kapasite limite.
Pòt pawòl LONU an di plizyè lekòl fèmen ann Ayiti pandan 2 semèn ki pase yo, e sa lakoz anviwon 2 milyon timounn ak jèn mounn pa kapab ale lekòl
Daprè pòt pawòl Nasyonzini an, nan kòmansman ane a, te genyen 2 milyon 600 mil Ayisyen ki tap fè-fas ak ensekirite alimantè. Li fè konnen kèk kòlèg li kap travay nan domèn imanitè a lanse avètisman pou di si sitiyasyon ki genyen kounye a ann Ayiti kontinye, sa kapab gen plis enpak sou plizyè milye moun ki te deja ap sibi konsekans yon ensikirite alimantè sevè, nan moman asistans alimantè pa kapab rive jwenn moun sa yo.
Pòt pawòl LONU an Stephane Dujarric fini pa di ajans Nasyonzini yo ansanm ak patnè yo ap chèche rekòmanse pote asistans bay sa ki nan bezwen yo le pi vit posib.