3èm Pi Gwo Diplomat Ameriken an, Thomas Shannon, Anonse Demisyon Li

Ozetazini, diplomat ki se 3èm pi gwo otorite nan Depatman Deta a, Thomas Shannon, anonse jedi premye fevriye 2018 la li pral bay demisyon li aprè 35 lane sèvis. Misye Shannon se dènye an dat pami anpil fonksyonè de karyè wo-plase ki pran desizyon pou yo kite sèvis diplomatik la depi Donald Trump te monte sou pouvwa a sa gen yon lane.

Misye Shannon pibliye yon deklarasyon kote li di: "Desizyon m nan se yon desizyon pèsonèl; li repoze sou volonte m pou m konsakre plis tan pou fanmi mwen, pran kontwòl lavi mwen epi fikse yon nouvo direksyon pou rès tan mwen rete pou m viv la."

Sekretè Deta Rex Tillerson, ki reponn kesyon ajans Associated Press, deklare li mande Misye Shannon pa bay demisyon li, paske li rekonèt diplomasi amerikèn nan t ap sibi yon gwo pèt si 3è pi gwo otorite nan Depatman Deta a kite sa. Misye Tllerson di: << 35 ane eksperyans se pa yon bagay ou ka ranplase demen lavèy. >>

Sekretè Deta a fè konpliman pou sa li rele "konesans ansiklopedik" Thomas Shannon genyen nan diplomasi amerikèn nan e li ajoute: "Ap toujou genyen yon plas pou Tom Shannon nan Depatman Deta a."

Malgre bèl konpliman Misye Tillerson fè Thomas Shannon, demisyon sa a byen kapab pwovoke plis kritik bò kote moun ki panse Prezidan Trump ak Sekretè Deta a ap nui travay sèvis diplomatik Lèzetazini an, sa ki rive bese anpil nivo moral la pami fonksyonè depatman an.

Sou-Sekretè Deta pou Diplomasi Piblik, Steven Goldstein, rejte nouvèl ki di kòmkwa demisyon Misye Shannon nan gen rapò ak yon nivo moral ki ba pami diplomat yo nan moman gen gwo rediksyon kap fèt nan bidjè depatman an, plis re-òganizasyon chèf diplomasi a, Rex Tillerson, ap opere nan sèvis etranje Lèzetazini an.