Kominote Ransèyman Etazini pral analize risk potansyèl ki te poze pou sekirite nasyonal la apre piblik la te vinn konnen yo te rekipere dokiman leta pandan fouy yo te fè 8 Out lakay ansyen Prezidan Donald Trump.
Se sa ki nan yon lèt ke ajans nouvèl Reuters wè.
Lèt la ki gen dat Vandredi 26 Out sou li, e ke Direktris Entelijans Nasyonal la (DNI) Avril Haines voye bay direktè Komisyon La Chanm kap travay sou kesyon ki gen rapo ak Ransèyman Adam Schiff epi Carolyn Maloney, di tou ke Depatman Jistis la ansanm ak DNI ap "travay ansanm pou fasilite yon revizyon klasifikasyon" materyo ke yo rekipere pandan fouy la.
Schiff ak Maloney di nan yon deklarasyon konjwen, ke yo kontan ke gouvènman an ap "analize dega ki te poze akoz dokiman sekrè sa yo pat sere komsadwa nan Mar-a-Lago." Se medya Ameriken Politico, ki te premye pou bay nouvèl sou lèt la.
