Nan fen jounen vandredi 19 oktòb 2018 la, Sèvis Kreyòl Lavwadlamerik la te gen plezi resevwa nan biwo li ak estidyo li yon delegasyon ki sòti nan Peyi d Ayiti e k ap vizite Lèzetazini nan kad yon pwogram "Echanj Vizitè" sou patwonaj Depatman Deta ameriken an. Delegasyon an gen ladan n:
M. Jean Marie Junior Salomon, Vis Prezidan Sena Repiblik d Ayiti a;
M. Abel Descollines, manm Chanm Depite Repiblik d Ayiti;
Mm. Farah Cadet, Sibstiti Gouvènman prè Kou Dapèl Pòtoprens la, enspektè Konsèy Siperyè Pouvwa Jidsyè a ann Ayiti;
M. Siméon Valet, Avoka, Prezidan Komite Afè Jidisyè Legliz Nazareyen d Ayiti;
M. Samuel Cadet, jounalis Radyo Boukman nan Site Solèy, Pòtoprens, Ayiti.
Nan yon entèvyou vizitè yo bay Jean-Piere Leroy e ki pase an dirèk sou Facebook (Facebook Live), yo te devlope, antwòt, tèm sa yo:
-Koripsyon nan administrasyon piblik la ann Ayiti;
-Responsablite gouvènman Moise-Céant nan pousuit ankèt sou itilizasyon "Kòb PetroCaribe a;
-Obtak sistèm jidisyè a -sitou Kou Siperyè dè Kont- ap konfwonte nan kad ankèt sou dosye "Kòb PetroCaribe a";
-Evantyalite yon repetisyon evennman 17 oktòm yo nan dat 18 novanm pwochen an e kisa gouvènman an ta dwe fè pou li evite sa;
-Respondablite 3 pouvwa yo nan rechèch limyè sou itilizasyon "Kòb PetroCaribe a."
Pou w suiv tout entèvyou a, ale sou: www.facebook.com/pg/VOA.KREYOL.