Premye Minis La Grand Bretay la, Theresa May, avek prezidan ameriken an, Donald Trump, manifeste volonte yo pou yo elaji kad echanj komèsyal kap fèt ant 2 peyi yo nan moman yo tap kòmanse yon seri de rankont madi 4 jen 2019 la nan vil Lond.
Pandan Prezidan Trump te pran lapawòl nan yon tablewond ki te reyini plizyè òm dafè, li deklare li panse 2 pati yo pral fini pa siyen "yon antant komèsyal ki trè-trè zenpotan" e k ap pote avantaj egal-ego pou yo tou lè 2.
Bò kote pa l, Madam May di La Grand Bretay ak Lèzetazini kapab elaji kad patenarya ekonomik yo a avèk yon antant komèsyal bilateral. Madan May di gouvènman li a kwè nan nesesite pou peyi yo kenbe mache yo lib, ekitab epi ouvè.
