Nèg ki te gen inifòm lapolis sou yo tire sou manifestasyon ouvriye yo fè Mèkredi, pou mande ogmantasyon salè ki pi wo pase sa premye minis la te anonse nan komansman semèn nan.
Jounalis yo wè mesye yo tire sou foul la pandan yo chita nan yon machin ki gen imatrikilasyon lapolis nan moman manifestan yo te deja komanse ap dispèse. Omwens 3 moun te blese, pami yo 2 jounalis ki tap fè repotaj sou manifestasyon an.
Yon pòt pawòl lapolis pat disponib pou fe komantè sou ensidan an ni pou di nan ki kondisyon sante moun ki blese yo ye.
Pi bonè nan jounen an, lapolis te tire gaz lakrimojen sou manifestan yo, ki te voye wòch sou yo, epi yo te sèvi ak kamyon pou bloke wout prensipal ki rive bò ayewopò entènasyonal Pòtoprens la. Jounalis Roi Des Infos (RDI) Lazzare Maxihen mouri pandan li te nan wout pou'l al lopital.
GADE: Repotaj Matiado Vilme
Robes Dimanche, manm kolektiv medya an liy esplike sak pase:
"Sak rive la a se yon sityasyon trajik kote ke noumenm antanke jounalis nou tap kouvri manifestasyon ouvriye yo te lanse jodia. Eben pandan nou tap kouvri manifestasyon an, lapolis kraze manifestasyon an kote ke te gen ajan CIMO, ajan UDMO ki te sou plas. Men apa de sa nou te gen konstate manifestasyon an te sanse rekomanse kote ke ouvriye yo yomenm tap desann sou wout ayewopo a," li esplike.
Dimanche di le manifestan yo sou wout la lapolis te lanse gaz lakrimojen sou yo epi manifestasyon an te kraze.
"Maintenan, gen yon gwoup manifestan ki te kanpe nan espas la e ki tapral eseye boule yon kawotchou. Se le moman gen yon bakòp ki tap pase. Fò'n di machin zo reken sa a li pa gen plak, li pa make polis tou. Tou senpleman pandan manifestan yo ap tire wòch sou mesye sa yo eben, nou konstate nou we chofe a ap di non pa tire wòch. Gen yon polisye ki deye a, polisye sa a li avek yon zam ki gen teleskòp ladann li tonbe tire. Sa'w tande a tout moun ate," misye deklare. Dimanche di li te kouche ate a tou.
"Se le nou leve, nou gade deye nou we gen anpil moun ki pran bal, pami yo gen 3 jounalis ki pran bal anba men mesye sa yo," li ajoute.
Sony Laurore, Laurore News ak Yves Moise, Radio-Tele Puissance te pami blese yo. Yvenson Jointville, jounalis Zenith FM kalifye atak le de yon zak "banditism".
"Sak rive la a, se pou montre ke nou pa gen yon fos de polis ki serye andan peyi a. Nou gen yon ekip bandi, yon bann malfra ki pran inifòm lapolis, ki se yon enstitisyon seryez ki mete sou yo pou yo kapab detwi jounalis," Jointville di VOA. "Jounen jodia nou konstate lapolis pran lapres kòm 'el mio'. Noumenm nap di lapolis, noumenm jounalis nou pa 'el mio'. Nou la pou'n ede peyi a avanse."
Jointville ajoute jounalis yo la pou ede lapolis nan travay yo, pa pou atake yo. "Jodia sak rive jounalis yo la a se yon siy pou montre chak jounalis kisa kap rive yo, kisa kap fet jounen jodia. Depi sou sak te pase nan epòt la le komise a te tire sou noumenm jounalis depi le sa a nou te pran sa kòm egzanp."
Mekredi te premye pami 3 jou grèv ouvriye yo òganize. Yo te fèmen pak endistriyel la pi bonè mwa sa a pou pwoteste kont salè yo a ki te apepre 500 goud ($4.80) pou 9èdtan travay pa jou.
Premye Minis Ariel Henry te anonse yon ogmantasyon nan salè kotidyen an ki 540 goud ($5) pou moun kap travay nan restoran ak nan sektè agrikòl la, epi 770 goud (plis pase $7) pou sa yo ki travay nan sipèmache yo, magazen ki vann machinn epi mezon finèb.
Yon pati nan enfomasyon pou repotaj sa a soti nan Associated Press.
