Prezidan ameriken an, Donald Trump, ak otorite yo nan Pentagòn nan (Depatman Defans la) rejte deklarasyon otorite Larisi yo fè pou di sistèm defans ayeryen siryen an te rive desann pi fò nan misil Lèzetazini, Lagrann Bretay ak Lafrans te lanse pou kraze enstalasyon pwoduksyon zam chimik Siri yo.
An fèt, nan jounen lendi 16 avril 2018 la, laprès nan Larisi site Ministè Defans peyi a ki ta fè konnen yon sistèm siryen ki rele Pant-Sir-S-1 tee bay 100 pou 100 randman, paske li te rive entèsepte tout misil kowalisyon Etazini te dirije a te lanse sou Siri.
Malgre deklarasyon sa a, Prezidan Trump ak otorite militè ameriken yo rete fèm sou anons yo te fè aprè seri atak yo pou di tou lè 105 kout misil Lèzetazini, La Grann Bretay ak Lafrans te lanse sou Siri yo, yo tout frape objektif yo, e se sèlman 2 minit ki te separe aterisaj misil yo.