Premye minis britanik la, Theresa May, rive chape anba yon vòt non-konfyans mekredi 16 janvye 2019 la aprè li te sibi yon defèt istorik nan palman an yon jou anvan sa, lè yon gwo kokenn majorite manm Chanm Commons nan (Chanm Bas la) te rejte akò li te siyen ak Inyon Ewòp la (The Brexil Deal ou Akò sou Separasyon an) pou La Grann Bretay kite inyon an nan fen mwa mas 2019 la.
Le fèt ke Madam May rive pase kap sa a, li gen posiblite kounyela a pou li re-santre atansyon li sou akò a nan negosyasyon li avèk palman an. Premye minis la genyen jiska lendi 21 janvye a pou l soumèt yon nouvo pwopozisyon devan Chanm nan; men moun poko konnen egzatteman kisa k ap nan pwopozison sa a.
Imedyatman aprè vòt 325 pou e 306 kont ki dewoule mèkredi a e ki pèmèt Madam May rete sou pouvwa a, li lanse envitasyon bay lidè pati yo pou yo reyini pandan sware a pou plis negosyasyon sou Akò Brexit la. Anvan vòt la Premye Minis la te deklare La Grann Bretay ta pral kite Inyon Ewòp la nan dat 29 mas 2019 la e sèl fason pou blòk la anvazaje yon pwolongasyon pou peryòd negosyasyon yo, se si britanik yo pwopoze yon plan separasyon ki reyalis.
Kèk pwòch kolaboratè Madam May fè konnen li pral eseye jwenn plis tan pou negosyasyon yo e li pral vwayaje Briksèl pou l chache pran tèt lidè ewopeyen yo pou yo aksepte re-negosye akò a. Sepandan, depi siyati antant la nan mwa novanm 2018, lidè inyon an te rejte plizyè fwa posiblite pou yo anvizaje pyès re-negosyasyon. Men, avèk defèt gouvènman May a sibi madi 15 janvye a –yon defèt ki rive aprè 5 jou gwo deba byen chofe- otorire britanik yo espere kounyela a Briksèl byen kapab ofri ase konsesyon pou garanti sipò palmantè yo pou yon vòt sou yon akò amande.
Lyonel Desmarattes prepare yon repòtaj sou dosye sa a.
