Sekretè Deta ameriken Anthony Blinken, mèkredi 15 Desanm 2021 an, avèti Mali sou konsekans finansye k ap tann li, e sou destabilizasyon peyi a, ki deja chaje vyolans, si gouvènman an rekrite gwoup mèsenè ris Wagner a.
Jent ki sou pouvwa a nan Bamako menase pou l chache sèvis sosyete prive sa a, ki sanble ta pwòch ak prezidan LaRisi Vladimir Putin, pou ede l nan lit kont jihadis yo.
Etazini, apre Inyon Ewòp la te fè sa lendi 13 Desanm nan, mete sanksyon sou gwoup Wagner a, e Blinken regrèt, Mèkredi 15 Desanm nan, ke Mali pa te dakò pou l-ONU deplwaye plis fòs li, "sa ki ta ede nan pwoteksyon pou sivil yo".
Sekretè Deta a di nan yon kominike, "Fòs Wagner yo, ki gen repitasyon pou aktivite ki pote destabilizasyon e pou vyolasyon kont dwa moun, pa pwal pote lapè nan Mali, men yo pwal destabilize peyi a pi plis toujou."
Dapre Blinken, asosyasyon ak Wagner a ka koute Mali 10 milyon dola pa mwa.
