Pou chache fè plis limyè posib sou kriz kap travèse PNH la (Polis Nasyonal d Ayiti), Lavwadlamerik pale ak yon ayisyen-ameriken ki nan sèvis aktif nan kò polis Ozetazini, Kaptenn Yvan Serge Pierre-Louis kap vini ak sigjesyon pratik sou pi bon fason dapre li pou rezoud pwoblèm nan.
Kaptenn Yvan Serge Pierre-Louis, gen anviwon 30 tan nan Depatman Polis Vil New York la e li te patisipe plizyè fwa nan fòmasyon PNH la.
Nan yon rankont ak Lyonel Desmarattes, kaptenn Pierre-Louis kanpe sou yon eksperyans solid ki otorize l bay otorite ayisyen yo konsèy sou fason yo ka jwenn yon solisyon pou kriz ki pete nan sen Polis Nasyonal la.
Si pou Kaptenn Yvan Serge Pierre-Louis, polisye aysiyen yo ta dwe gen yon sendika pou defann dwa yo, otorite nan polis la bò kote pa yo fè kwè, lwa entèn ensitisyon an entèdi kreyasyon sendika.Enspektè Jeneral an chef polis la, IGPNH, Hervé Julien nan yon konferans pou laprès semen pase a fè konnen enstitisyon lap dirije a ap rete atache ak tout tèks de lwa entèn polis la.
Mèt Samuel Madistin ki travay kòm konseye wo eta majò polis la, nan yon entèvyou ak Lavwadlamerik ale nan menm sans ak IGPNH Julien pou l di si polisye yo gen yon pwoblèm yo dwe adrese l a siperyè erachik yo ki yo menm gen pou fè suivi a bò kote otorite konsène yo.
Yon lòt kote, revokasyon 5 nan polisye ki alatèt mouvman sendika a sanble vin mete plis lwil sou dife nan tòchon kap boule ant wo etamajò polis la ak ajan yo, kote Prezidan repiblik la, Jovenel Moise entèvni pou l mande konsène yo mete sou pye yon komisyon ak yon lis rekòmandasyon prese prese sou fason pou rezoud kriz sa a kap travèse PNH la san pèdi tan.
Ministè Lajistis ki se ministè titèl polis la pibliye yon lis ak non moun ki fòme yon komite pou panche sou pwoblèm PNH la. Sepandan polisye yo ki te manifeste semen pase a mande reyentegrasyon polisye Yannick Joseph, kowòdonatris mouvman sendika ak 4 lòt polisye yo te revoke pou endisiplin, avan pou chita pale ak dirijan yo sou kesyon sendika e lòt revandikasyon polisye yo genyen pami yo: ogmantasyon salè ak bon jan mwayen pou fè travay yo, avantaj sosyo, e latriye.