Nouvèl ki soti nan pi gran vil peyi Kazakstan an, Almaty, fè konnen fòs sekirite gouvènman an yo, ak èd twoup ke LaRisi apiye, tire sou manifestan nan vil la, e touye dè douzèn nan yo, pandan revòlt nan ansyen repiblik sovyetik la ap ogmante.
Nan video-nouvèl ke yo filme nan lari Almaty, moun ka wè fòs sekirite yo - kèk nan yo nan machin blende - k ap tire sou yon foul manifestan sou plas Repibliken an nan nan vil-la.
Lapolis nan Kazakstan, dapre nouvèl yo, touye dè douzèn manifestan e mete anba kòd plis pase 2-mil nan yo nan yon jounen. Gen nouvèl ki fè konnen plizyè ajan lapolis pèdi lavi yo tou.
Koukou-wouj sa a vini yon jou apre manifestasyon ki te tanmen kèk jou anvan sa sou kesyon pri gaz ki moute, kote manifestasyon vyolan te fèt sou beton an, e kote moun te mache ak baton, anvayi bilding gouvènman, pami yo rezidans pezidan-an.