La Risi deklare Mèkredi pa gen okenn siy ap gen yon antant nan negosyasyon lapè ak Ikrèn nan moman nouvèl yo fè konnen Moskou vyole yon pwomès pou'l redwi operasyon militè li yo ozalantou Kyèv ak nan vil Chernihiv ki sitye nan nò a.
Ikrèn prezante yon lis demann nan komansman negosyasyon yo Madi nan Istanbou, peyi La Tiki ki te vize mete fennan lagè a ki ap dewoule depi 36 jou, pòt pawòl Kremlen an Dmitry Peskov fè konnen pandan yon konferans pou laprès.
Yon konseye Prezidan Ikrenyen Volodymyr Zelenskyy di 2 pati yo te diskite sou posib kondisyon pou yon seselfe, epi garanti sekirite entènasyonal pou Ikrèn pandan sesyon Madi a.
Negosyatè Ikrenyen yo pwopoze tou pou Kyèv adopte yon stati net epi pran angajman pou'l pa vinn manm LOTAN ni okenn lòt alyans militè ann echanj pou garanti sekirite bò kote peyi Oksidantal yo.
Peskov di jounalis yo Moskou byen akeyi le fèt ke Kyèv prezante yon deklarasyon sou papye kote li fè demann sa yo men li di La Risi poko wè okenn bagay ki ba li espwa ke sa pral debouche sou yon akò final.
Pandansetan, otorite lokal yo fè konnen twoup Ris yo kontinye atak ak gwo zam lou ozalantou Kyèv ak nan vil Chernihib nan nò a, malgre li La Risi te pwomèt pou'l redwi operasyon li nan zòn sa yo kòm jès bònn volonte.
