Alòske lontan yo te konsidere Lèzetazini kòm yon rezèvwa vaksen li te itilize pou pwòp popilasyon pa l, jounen jodi a peyi a ap pataje doz vaksen kont KOVID-19 li gen lakay li ak rès mond la, daprè yon angajman Administrasyon Biden nan pran pou l fè livrezon yon demi milya doz nan plizyè peyi atravè lemond anvan fen ane 2021 an.
Nan kad angajman sa a ke gouvènman Biden-Harris la pran pou l konbat pwopogasyon pandemi kowonaviris la sou latè, li mete yon milyon doz vaksen Johnson & Johnson a la dispozisyon peyi Tannzani nan wikenn pase a; se sa n ta kapab rele yon premye vèsman; epi nan jounen mèkredi 28 jiyè a nouvo prezidan peyi afriken sa a se premye moun ki resevwa vaksen an.
Tannzani se youn nan dènye peyi sou kontinan afriken an ki resevwa yon vaksen kont KOVID-19. Prensipal rezon ki eksplike sa se le fèt ke ansyen lidè peyi a, ki te mouri nan mwa mas pase a, te pretann ke lapriyè sèlman kapab geri maladi a. Sepandan sitwayen tannzanyen yo kontinye afiche yon konpòtman depaman sou kesyon pou konnen èske yo dwe pran vaksen an ou pa.
Hawa Bihoga, k ap viv nan kapital la Dar-Es Salaam, fè konnen “aksyon nouvo prezidan peyi a pran pou l mennen pèp la nan yon lòt direksyon nan batay kont kowonaviris la, se yon aksyon ki pote soulajman bay tannzanyen yo.”
Kelvin M’Mari, limenm, montre kijan popilasyon an divize sou kesyon vaksen an, paske misye deklare: “Mwen pa dispoze fè yo vaksinen m. Poukisa pou n pa anvizaje solisyon tradisyonèl nou yo? Poukisa nou oblije itilize yon medsin etranje?”
Malgre ezitasyon sa a, minis sante piblik tannzanyen an, Dorothy Gwajima, ensiste pou l di vaksen an pa gen danje ladan l. Minis la deklare: “Sitwayen tannzanyen yo ta dwe sòti al fè yo vaksinen yo ak tout konfyans, san kèsote.”
Sa gen yon semèn, Lèzetazini te voye nan Boukina Faso plis pase 150 mil dòz vaksen Johnson and Johnson. Anbasadris amerikèn nan peyi sa a, Sandra Clark, te asiste seremoni kote livrezon vaksen yo t ap fèt la. Diplomat la di:
“Pral genyen plis livrezon toujou nan 2 zou 3 semèn ak mwa ki pral vivni yo.”
Sepandan, daprè Sant Afriken Pou Kontwòl ak Prevansyon Maladi, nivo vaksinasyon an ba anpil-anpil sou kontinan an kote se sèlman 2 pousan sou yon total yon milya 200 milyon moun k ap viv an Afrik ki deja resevwa yon dòz vaksen kont KOVID-19.
Nan kad menm pwogram asistans Lèzetazini genyen pou l distribiye vaksen atravè lemond la, Akunna Cook, Vis-Asistan Sekretè Deta ameriken pou Afè Afrikèn ki pale avèk Lavwadlamerik pa Skype, fe konnen Washington dispoze ede peyi etranje yo devlope pwòp vaksen pa yo:
“Nou envesti lajan nan fabrikasyon vaksen nan Afrik di Sid ak Senegal… yon fason pou n garanti ke Lafrik kapab pwodui pwòp vaksen pa l. Se konsa tou n ap bay asistans ekonomik pou peyi kote pandemi an deja fè dega; pou sa nou bay yon asistans ki monte rive 541 milyon dola.”
Pandan anpil obsèvatè, ki bay opinyon yo sou pwogram Lèzetazini lanse pou l kore yon kanpay vaksinasyon nan plizyè peyi, fè konpliman pou desizyon Washington pran pou l pataje vaksen ki disponib lakay li ak rès mond la, an menm tan tou yo atire atansyon sou le fèt ke, daprè yo, asistans gratis sa pa sifi, paske sa pa kapab renplase yon bon jan plan pou derasinen pandemi KOVID-19 la nètnèt nan lemond.